Lærdal kommune varslar med dette oppstart av arbeid med områderegulering for flaumsikring Lærdalselvi ved Lærdalsøyri. Samstundes blir planprogrammet sendt ut på høyring og lagt ut til offentleg ettersyn.
Formannskapet vedtok i møte 12.06.2025 å gi kommunedirektøren mynde til å legga framlegg til planprogram ut på høyring og varsla oppstart av arbeid med Områdereguleringsplan flaumsikring Lærdalselvi ved Lærdalsøyri, jf. §§ 4-1, 12-1, 12-2 og 12-8 i plan- og bygningslova.
Oppstartsvarsel blir sendt til alle grunneigarar i planområdet, naboar som grensar til planområdet, relevante lag og organisasjonar, næringsaktørar samt regionale og nasjonale styresmakter.
Lærdal kommune ønsker innspel frå alle grunneigarar og andre partar som kan bli påverka av tiltaket, og oppmodar difor sterkt om å sende inn skriftlege merknader til planarbeidet i høyringsperioden. Frist for å koma med merknader er sett til 21. desember 2025.
Planområdet
Kartet syner planområdet ved oppstart av planarbeid. Planområdet dekker eit større område enn det sjølve tiltaket krev. Dette sikrar fleksibilitet og heilskap i planlegginga samt gir rom for tilkomst i bygge- og anleggsfasen. Planområdet vil truleg bli snevra inn når nøyaktig plassering av tiltak er avklart.
Bakgrunn for planarbeidet
Lærdalsøyri har historisk vore utsett for flaum ved storflaumar i Lærdalselvi. Flaumsonekartet frå 2024 viser at 1.143 bygg er utsett for 200-årsflaum, medan 1.159 bygg er utsett for 1000-årsflaum. Dette betyr at det er flaumfare på nesten heile Lærdalsøyri. Hovudformålet med planarbeidet er å sikra eksisterande busetnad og infrastruktur på Lærdalsøyri mot flaum, i tråd med krava i Byggteknisk forskrift (TEK17). Dette vil også mogleggjere vidare utvikling av Lærdalsøyri som tettstad og kommunesenter.
Lærdal kommune har dei siste åra hatt eit samarbeid om flaumsikringa for Lærdalsøyri med Noregs vassdrags- og energidirektorat (NVE). I 2024 utarbeidde Multiconsult på oppdrag frå NVE ein moglegheitsstudie for heilskapleg flaumsikring av areala frå Høgakleivi/Hunderi til Lærdalsfjorden. Med bakgrunn i moglegheitsstudien skal Lærdal kommune utarbeida ein områdereguleringsplan for flaumsikringa.
Planprogram
Det er utarbeidd eit planprogram som grunnlag for planarbeidet. Planprogrammet gjer greie for:
- Formålet med planarbeid
- Lokalisering og val av alternativ
- Utgreiingstema
- Vidare planprosess og medverknad
Planprogrammet kan lesast her: Framlegg til planprogram, trykk på denne lenkja
Meir informasjon om flaumsikringsprosjektet kan ein finna på flaumsikringsprosjektet si eiga side, klikk på denne lenkja for å koma dit.
Informasjonsmøte om planarbeidet
I høyringsperioden skal Lærdal kommune, saman med NVE, arrangera eit informasjonsmøte på Lærdal kulturhus (adresse: Øyraplassen 14, 6887 Lærdal). Dette møtet vil finna stad måndag 17. november kl. 18-20. I informasjonsmøtet skal kommunen og NVE orientera om det vidare arbeidet. Representantar frå NVE og kommunen er til stades på kulturhuset frå kl. 16 for å svara på spørsmål.
Vidare dialog med grunneigarar i planområdet
Lærdal kommune ønsker å inngå dialog med grunneigarar som kan bli direkte påverka av tiltaket i ein tidleg fase av planarbeidet. Kommunen tar kontakt med desse grunneigarar og kallar inn til møte. Oppstart av grunneigarmøta er planlagd til første halvår av 2026.
Innspel
Planarbeidet vil kunna råka interesser til mange grunneigarar, samt lag og organisasjonar. Alle som har merknader til planarbeidet blir oppfordra til å senda inn innspel til kommunen. Alle innkomne innspel og uttalar i høyringsperioden blir vedlagt i saka der kommunestyret fastset planprogrammet. Frist for å koma med innspel er sett til 21. desember 2025.
Du sender inn høyringsinnspel på ein av to måtar:
- På e-post til: post@laerdal.kommune.no
- I papirform til: Lærdal kommune, Øyraplassen 7, 6887 Lærdal. Merk konvolutten med “Høyringsinnspel”
Dersom høyringsinnspelet er kome inn innan høyringsfristen, blir det i sin heilskap lagt ved i sakspapira til den politiske handsaminga av saka. Høyringsinnspelet og kven som har sendt det blir altså offentleggjort. Du har ingen krav om å få eksplisitt svar på høyringsinnspelet og/eller at det blir heilt/delvis teke til følgje.
Merk innspelet med saksnummer 25/1324 eller «Innspel til flaumsikring på Lærdalsøyri».
Har du spørsmål knytt til planarbeidet?
Spørsmål om planarbeidet kan rettast til arealplanleggar og prosjektleiar Niklas Aarnio.