Forskrifta vert lagt ut på høyring med heimel i Brann- og eksplosjonsvernloven §13 fjerde ledd.
Forslaget går ut på å føra tilsyn med bygningar i Lærdal som inkluderer bygg i verneområdet i Lærdal, verksemder med utleigebustader, bueiningar med personar som fell innunder særskilt utsette og sårbare grupper i høve å omkoma i brann og andre områder der risikovurdering kan tilseia at tilsyn er eit fornuftig verkty for å førebygga brannar og ulykker. Forskrifta vil og gjelda serveringsstadar som nyttar frityr, gass, grill.
Sjå høyringsframlegget ved å klikka på denne lenkja. (PDF, 61 kB)
Alle kan gi høyringsuttale. Merknader kan ein gi elektronisk til post@laerdal.kommune.no. Frist for å gi høyringsuttale er 1.april 2026.
Du sender inn høyringsinnspel på ein av to måtar:
- På e-post til: post@laerdal.kommune.no
- I papirform til: Lærdal kommune, Øyraplassen 7, 6887 Lærdal. Merk konvolutten med “Høyringsinnspel”
Dersom høyringsinnspelet er kome inn innan høyringsfristen, blir det i sin heilskap lagt ved i sakspapira til den politiske handsaminga av saka. Høyringsinnspelet og kven som har sendt det blir altså offentleggjort. Du har ingen krav om å få eksplisitt svar på høyringsinnspelet og/eller at det blir heilt/delvis teke til følgje.
Lærdal brann og redning vil deretter samanstilla høyringsuttalane og førebu ei politisk sak til kommunestyret sitt møte 21.mai 2026. Det er kommunestyret som kan fatta endeleg vedtak om ny forskrift med heimel i Brann og eksplosjonsvernloven §13 fjerde ledd.
Forskrifta vil deretter kunngjerast i Norsk Lovtidend.
Det har skjedd mange endringar lokalt og nasjonalt dei siste åra, både når det gjeld bruken av bygningar i verneområdet og at brannvesenet har fått andre føringar frå sentrale myndigheiter når det gjeld prioritering av innsats i det brannførebyggjande arbeidet. Samarbeid mellom kommunale tenesteytarar om branntryggleik for risikoutsette personar er ei av oppgåvene som vert prioritert svært høgt i nasjonale føringar, og der ein med vellykka innsats har størst moglegheiter for å førebyggja alvorlege ulykker og tal omkomne i brann.
Føremålet med forskriftsforslaget er å bidra til eit meir målretta og risikobasert brannførebyggjande arbeid i Lærdal kommune. Forslaget skal gi Lærdal brannvesen heimel til å føra tilsyn med bygg og verksemder som ikkje blir omfatta av dagens nasjonale regelverk, men som likevel utgjer ein potensiell risiko. Ei lokal forskrift vil styrka tryggleiken for innbyggarane, eigendommar og lokalsamfunn.
Lokal forskrift vil både kunne forenkla kommunen si sakshandsaming og gi eit betre og meir effektivt brannførebyggjande arbeid. Den vil bidra til å førebygga brann og redusera konsekvensane av brann i nærare bestemte bygningar som ikkje vert omfatta av brann- og eksplosjonsvernlovens føringar om særskilte brannobjekt. (§13).