Frå Lærdalsturneringa
Ole Ramshus Sælthun
Frivillig innsats er ein viktig del av lokalsamfunnet i Lærdal. Det finst fleire støtteordningar som kan bidra til å realisera aktivitetar, arrangement og prosjekt – eller styrka den daglege drifta i laget.
Nedanfor finn du ei samla oversikt over dei mest aktuelle ordningane, samt råd som kan auka sjansen for å lukkast med søknaden.
Kulturmidlar i Lærdal kommune
Lærdal kommune deler kvart år ut kulturmidlar til frivillige lag og organisasjonar som driv kulturarbeid i kommunen.
Kven kan søkje:
Frivillige lag og organisasjonar med kulturverksemd i Lærdal.
Kva kan de få støtte til:
Drift, arrangement, aktivitetar og prosjekt.
Kva blir vektlagt i vurderinga:
– Aktivitetsnivå
– Økonomisk situasjon
– Tilbod til barn og unge
Søknadsfrist:
15. april (årleg)
Søknad:
Elektronisk søknadsskjema via ID-porten. Hugs at ufullstendige søknader kan bli avslegne.
Andre aktuelle støtteordningar i Sogn og Vestland
Sparebankstiftinga Sogn og Fjordane
Gåvemidlar til samfunnsnyttige tiltak innan kultur, idrett, friluftsliv og nærmiljø.
– Ordinære fristar: 1. mars og 1. september
– Mindre beløp kan ofte søkjast løpande
Sogn Sparebank – gåvefondet
Støtte til allmennyttige prosjekt i Sogn.
– Søknadsfrist 10. mars
– Søknad via banken si nettside
Sparebanken Vest / Sparebanken Norge
Støtte til aktivitetar og prosjekt innan kultur, idrett og inkludering i Vestland.
– Digitale søknadar, ulike søknadsordningar med ulike fristar.
i tillegg fins det fleire andre søknadsordningar som Gjensidige-stiftinga, Kraftrikefondet og Olav Thon-stiftinga, som kan vera aktuelle for lag i Lærdal.
Kva kjenneteiknar ein god søknad?
Ein god søknad er tydeleg, konkret og lett å forstå. Tenk at dei som vurderer søknaden skal få oversikt på få minutt.
Ein enkel og effektiv struktur kan vera:
- Kort samandrag: Kva de skal gjera, kven tiltaket er for, og kor mykje de søkjer om
- Behov og mål: Kvifor er tiltaket viktig no?
- Målgruppe og inkludering: Kven får nytte av tiltaket?
- Plan og framdrift: Kva skjer når – og kven gjer kva?
- Budsjett: Realistisk, i balanse og med synleg eigeninnsats
- Gjennomføringsevne: Erfaring, ansvar og frivillig kapasitet
- Resultat: Korleis veit de at tiltaket fungerer?
Treng de rettleiing?
Er de usikre på kva ordning som passar best, eller ønskjer innspel før de sender søknad? Ta gjerne kontakt med Ole Sælthun eller Guro Nesse i Lærdal kommune.