Biblioteket skal byggjast om og innreiast på nytt, og vert heilt stengt fram til midten av desember. Men før stenginga vert det fleire arrangement både i biblioteket, kulturhuset og Sogn kunstsenter – så det er mange grunnar til å komma innom bygget den neste veka.
Kokosbananas forteljarstund
Rolf Magne G. Andersen
Laurdagsope med forteljarstund
Laurdag 19. september held biblioteket laurdagsope frå kl. 11.00 til 15.00. Same dag kjem forfattar Rolf Magne G. Andersen på besøk med forteljarstund frå dei populære Kokosbananas-bøkene kl. 14.00 i kultursalen. Ta med borna og bli med!
📅 Sjå arrangementet på Friskus
Langope siste opningsdag – og teater i kulturhuset
Torsdag 24. september er siste høve til å stikke innom biblioteket før det stenger. Denne dagen held me langope, heilt til kl. 19.00.
Same dag kjem Teater Vestland til Lærdal kulturhus med framsyninga Den dagen Nils Vik døde. Stykket er basert på Frode Grytten si prisvinnande roman og har hatt fleire utselde førestillingar i Førde og Bergen.
📅 Meir informasjon om framsyninga
Siste sjanse til å sjå utstillinga «Der me er»
Utstillinga Der me er
Terje Grimen
Den siste opningsveka til biblioteket er også siste sjanse til å oppleva utstillinga Der me er i Sogn kunstsenter. Utstillinga heng til og med fredag 25. september.
Utstillingsperioden vert avslutta med kunstnarkonferansen Der vi er. Konferansen samlar kunstnarar og fagfolk til samtale og fagleg påfyll, og er open for alle mot påmelding.
📅 Les meir om konferansen hjå Kunstnarsenteret i Sogn og fjordane
Kva skjer vidare?
Frå fredag 25. september og fram til midten av desember er biblioteket heilt stengt, medan lokala vert bygde om til eit nytt og meir funksjonelt bibliotek. Opningsdato for det nye biblioteket kjem seinare.
Fjernlån og anna utlån vert diverre stengt i perioden. Men me fyller på med tøyvesker til barnehagane som kan lånast med heim gjennom Tøyveskebiblioteket, og skulane får tett oppfølging av barnebibliotekaren vår. I tillegg forlengar me lånetida til alle som låner den neste veka.
Ta kontakt med biblioteket om de har spørsmål eller innspel til oss, eller om de ynskjer å forlenge dei låna de ha. Me gler oss til å ynskje dykk velkommen tilbake i desember!