No kjem dei frå krig til Lærdal - Laurdag blir det venskapskveld

Frå jerikobesøket sommaren 2023. Wiam Erikat (nr. 2 frå venstre) er i spissen når sju gjester kjem på besøk no drygt to år seinare. Leiar i venskap Jeriko-Lærdal, Anna J. Avdem, er nr. 2 frå høgre på biletet.

Onsdag 27. august får Lærdal eit nytt besøk frå Jeriko. Gruppa som kjem har sju deltakarar, og i spissen for dei er Wiam Irikat, som er hovudkontakt for vennskapssamarbeidet i Jeriko og har vore i Lærdal fleire gonger før.

Sjå program nedst i artikkelen

Anna Avdem, leiar i Vennskap Jeriko-Lærdal, fortel dette om besøket: 

-Det kjennest nesten som eit under at vi får til dette slik som forholda er i Palestina no. Eg tør ikkje tru det er sant før eg ser dei på flyplassen. Det er to år sidan vi hadde besøk sist, og sidan da har forholda forverra seg mykje også i Jeriko og elles på Vestbreidda, sjølv om det så langt ikkje er like gale som i Gaza.

Palestinarane møter hindringar over alt. Lovløysa rår. Tungt væpna israelske soldatar og ulovlege busetjarar set opp sjekkpunkt og kontrollerer trafikken på vegane og inn til byane. Næringslivet blir kvelt, arbeidsløyse, frykt og naud brer om seg. No kjem dei inn i byar som Jeriko kvar einaste dag, overtek jord, riv hus og arresterer. 

Oppi det heile er det så vanskeleg for palestinarane å få besøksvisum til Norge at vi hadde lita tru da vi begynte å planleggja dette besøket. Men vi har jobba mykje og tett med vennene i Jeriko om visumsøknaden, og under over alle under – dei fleste som søkte visum fekk det! Så no håpar vi berre dei kjem trygt fram!"

Skal feira 20-årsjubileet til Jerikobui

Ordførar Audun Mo vil sjølv møta gjestene på Gardermoen, og dei får eit innhaldsrikt program dei dagane dei er i Lærdal.

-Besøk på rådhuset og skulane er fast, og feiringa av 20-årsjubileet til Jerikobui blir eitt av høgdepunkta. Det er berre fire palestinabutikkar i Norge, så vi er stolte over å vera ein av dei! Jordbruk er elles eit viktig tema for dette besøket, så gjestene skal både på gardsbesøk og på Sogn frukt og grønt i Håbakken.

 Laurdag ettermiddag blir det Vennskapskveld i kulturhuset, der gjestene vil fortelja om livet i Jeriko no. Det blir også ulike kulturinnslag og pizza-mingling i kafeen etterpå. Vi håpar både lærdølene og andre sogningar nyttar dette høvet til å møta gjestene og få snakka med dei som opplever ei av verdas verste katastrofar på kroppen" seier Avdem, som i lag med andre i Jerikolaget har fulle dagar med planlegging for tida.

Program Jerikobesøk i Lærdal