Einingsleiar ved Borgund, oppvekstsenter, Linda Maristuen og styrar i Lærdalsøyri barnehage, Anne Margrete Hatlelid.
Ole Ramshus Sælthun
-Det er jo veldig positivt, for grunnen er først og fremst det høge talet på barnehageborn, seier styrar i Lærdalsøyri barnehage, Anne Margrete Hatlelid.
Ho og kollega Linda Maristuen, einingsleiar og rektor ved Borgund oppvekstsenter, søkjer no først og fremst etter to barnehagelærarar i faste 100% stillingar, men barne- og ungdomsasrbeidarar og assistentar kan også vera aktuelt.
Klikk på lenkja for å sjå stillingsutlysinga med søknadsfrist 5.november.
- Rett og slett kjempegøy
For med hovudopptaket som har vore no blir det i løpet av vinteren 116 born i Lærdalsøyri barnehage og 24 born i barnehagedelen på Borgund oppvekstsenter. Totalt 140 born, altså, medan talet for fem-seks år sidan låg på rundt 100.
-Det er jo rett og slett kjempegøy, seier Maristuen.
Når dei treng fleire tilsette er det altså først og fremst på grunn av mange born. I tillegg har rekrutteringa av nyutdanna frå Høgskulen på Vestlandet vorte mindre på grunn av færre som studerer barnehagelærar.
-Det merkar me veldig godt. Det var eitt år utan studentar i det heile, altså ingen kvalifiserte søkjarar til studieplass. Og dei skulle ha vore ferdig utdanna no i år, forklarar Hatlelid.
Nyrenovert småbarnsavdeling på Lærdalsøyri barnehage
Ole Ramshus Sælthun
- Nye, moderne bygg
Ein annan årsak til at dei treng fleire tilsette er den sokalla Lærdalsnorma. Medan den nasjonale bemanningsnorma er ein tilsett per tre born under tre år og ein tilsett per seks born over tre år, er bemanningsnorma i Lærdal ein tilsett per 2,25 born under tre år og ein tilsett per 4,5 born over tre år. Norma vart innført ved årsskifte.
Sjølv om det krev fleire tilsette gjer det også stillingane meir attraktive ettersom poenget med norma er mindre slitasje på dei tilsette, og meir tid med borna.
-I tillegg har me veldig fine lokale i begge barnehagane no. Det gjer noko med trivselen, og blir sett veldig pris på blant dei tilsette, seier Maristuen.
Barnehagedelen på Borgund oppvekstsenter er eit nytt tilbygg til skuledelen, som også er renovert. Dette stod ferdig ved inngangen til 2025. Og småbarnsavdelinga på Lærdalsøyri barnehage er totalrenovert, i praksis eit nytt bygg, som tilsette og born flytta inn i i starten av oktober.
Borgund oppvekstsenter
Oleg Ovcharuk
- Veldig kjekke kollegaer
Dei har også styrkja samarbeidet mellom barnehagane – talet på born varierer som kjent, så behova varierer stadig. Dermed har det vore ein del tilfelle av at tilsette den eine plassen, etter eige ønskje, har byrja å jobba den andre plassen.
-Det er relativt lite miljø på Borgund og relativt stort miljø hjå meg. Så på den eine sida har me større fagmiljø – som nokre set pris på – medan det på Borgund er lite og oversiktleg, som andre set pris på, forklarar Hatlelid.
Dessutan driv begge barnehagane med utviklingsprosjekt, mellom anna samarbeidsprosjektet «Saman mot mobbing». I tillegg har Lærdalsøyri barnehage gåande prosjektet «Miljø, mat og berekraft», som også kan bli aktuelt på Borgund etter kvart.
-Så er det veldig kjekke kollegaer, ein fin gjeng å jobba med. Både unge og erfarne, så me har gode arbeidsmiljø.